豬豬翹's profile我係花腩妹PhotosBlogListsMore  |  Tools Help |
|
January 02 yahoo blog 無左喇 ...我無用 yahoo blog 喇, 因為如果要留言, 要人地都開 blog, 唔夠 user - friendly 啦
家姐話 SINA 好用 D, 咁好啦, 我就轉去 SINA 啦
呢個係新地址, 真係唔好意思呀
December 20 媽媽農曆生日飯 @ 官塘好彩November 29, 2008 (Saturday)
今晚係官塘好彩, 同媽媽食農曆生日飯, 咁我就梗係例牌整蛋糕架啦
我就整左個媽媽鐘意食既栗子蛋糕, 點知家姐又係聖安娜訂左個栗子脆脆, HAHA ... 又會咁啱既
 不過, 個蛋糕我整得唔好, 因為都無咩心機整 ... 正衰女呀我
 你地睇吓個壽包幾圓幾滑, 不過, 我食左半個, 已經食唔落喇, 因為真係好大個 ...
December 09 丁丁聚會 @ homeNovember 25, 2008 (Tuesday)
丁丁今日約左 ERIC, YY, 亞龍, ISSAC 傾野, 咁我就提議不如上黎屋企傾啦, 一黎坐得自在 D, 我又可以煮多 D 餸
今日好叻呀我, 煮左 5 餸 1 湯 : 瑤柱豆苗, 土魷蒸肉餅, 粟米魚塊, 糖醋骨, 蜜汁雞排, 同埋青紅蘿蔔煲豬展
不過我唔係好滿意個肉餅, 可能我洗得 D 土魷太乾淨, 無晒 D 味 ... 所以食唔出係土魷蒸肉餅
 食完佢地就開始傾野, 我洗埋 D 碗, 就整飯後甜品 - 曲奇餅俾佢地食
哈哈, D 曲奇餅都 OK 受歡迎喎, 每 "底" 出黎都食晒咁滯
食飽傾完都差唔多 11 點幾先走, 大家都攰攰喇 ...
December 03 觀禮 + BBQNovember 23, 2008 (Sunday)
今日係 BER BER 既大喜日子, 佢 9:30 係紅棉道註冊結婚, 真係恭喜晒呢!!
 難為丁丁好早起身, 車左我去灣仔 JOIN 埋亞 MEI 地一齊坐的士上去, 到左之後我地影左一陣相, 就夠鐘行禮 LU ... 行完禮左後, 亞 MEI 地話去飲茶, 返到落灣仔差唔多 11 點, 不過我唔去喇, 一黎丁丁等緊我, 二黎約左艾力地 1230 係旺角等, 所以我去搵返丁丁就返屋企喇 ...
今日我地同艾力慶生辰, 所以約好齊齊入元朗 BBQ, 去旺角接左佢地, 我地就先去大埔買 BBQ 料, 再返入元朗
起得爐, 洗得海鮮黎, 都差唔多成 4 點先開始燒, 慢慢燒到 8 點幾, 睇左一陣電視, 我地就同艾力切蛋糕喇, 我應壽星仔既要求, 整左個 NEW YORK CHEESECAKE 俾佢
不過我覺得個蛋糕整得唔係太好, 好似差左 D 野咁, 但又唔知差左 D 咩喎 ...
大概 10 點, 我地就走 LU, 始終聽日個個都要返工嘛 ... 車返佢地去旺角搭車, 我同丁丁就返屋企 LU ... 玩左成日, 好攰攰呢
November 28 澳門兩日一夜自由行November 19, 2008 (Wednesday)
星期一係爸爸生日, 爸爸又想去澳門喎, 咁我地就一家人去啦
媽媽想住威尼斯人, 不過 17 號竟然 FULL BOOKING 同埋好貴, 所以家姐就係 <ROCK'S HOTEL 萊斯酒店> 訂左房, 我地兩個都好想住嗰間酒店, 因為睇相已經覺得好靚, 而且今次間酒店有做 promotion, 比平時平好多呢 ...
我地 12 點左右去到酒店, CHECK IN 先, 但未有房拎, 所以我地過左去隔離個 "娛樂城", 主要係爸爸想玩, 媽媽 & 亞 B 陪佢玩, 我同家姐就行埋一邊等佢地, 差唔多 1 點, 我地就返去攞房喇, 因為爸爸夠鐘換水
 我地就趁機影相啦, 間房真係好靚呀, 有我最鐘意既嗰款床  個浴缸都好正呀, 好電影 FEEL 囉 爸爸搞掂後, 我地就去左酒店個 COFFEE SHOP 食 TEA, D 野好好食, 杯咖啡都唔錯呀
食飽飽後, 我地就去金沙坐 SHUTTLE 去威尼斯人 LU ... 嘩 .... 威尼斯人真係好大呀, 大過 VEGAS 嗰間 (感覺上)
好多國內同胞, 同埋上去 LOBBY 嗰吓, 真係有 D 似過羅湖關既感覺
 個賭場好大, 大得好誇張呢 ... 真係一望無際既賭海啊 ~~~
我地沿住 SHOPPING MALL 既大運河行, 原本想爸爸媽媽坐船仔架, 但爸爸點都唔肯, 咁算啦 ... 雖然媽媽好想同佢坐
 之後我地諗住走架喇, 去官也街食水蟹粥, 但爸爸又想玩多一陣, 咁我, 家姐 & 媽媽就坐低係 CAFE 等佢地啦
間 CAFE 都好靚, 望上去個天花板既圖畫又好靚, 連 D 籌碼都好靚呢, 哈哈 ~~~
之後我地就去左食水蟹粥, 不過真係麻麻地啦 ... 都唔係太好食. 食完要返酒店喇, 因為爸爸要放水喇 ...
返到去, 我, 家姐 & 亞 B 決定出去食宵夜, 我地去左蔡瀾介紹嗰間 <祥記麵家>, 我個人覺得好好味
我地叫左蝦子撈 x 4, 薑蔥撈 x 1, 白灼魚皮 x 1, 鯪魚球 x 1 (食完先記得影), 大汽水 x 1, 再加外賣 (蝦子撈, 魚皮, 雲吞麵各一), 埋單要 $180, 都 ok 呀, 因為食左好多野
不過, 支汽水黎到既時候我真係嚇親囉, 因為我無諗過大支係咁大支, wakakakak ~~~
返到去就陪爸媽食宵夜, 家姐沖白白先, 我睇埋電視先沖兼同個浴缸玩
 吹埋頭都成 3 點先瞓  第二朝去酒店 coffee shop 食早餐 buffet, 之後去左漁人碼頭行, 夠鐘就 check out, 再去媽閣嗰邊食葡國菜
我地無去亞蘇介紹嗰間港灣, 反而去左過幾個舖位既內港, 我地揀嗰間 d 野都好好食呀, yum yum 既呢 !!!
食飽飽亞 B 要返香港, 佢自己一個走先, 咁我地一家四口就去左媽閣廟, 行完之後就返酒店 HEA, 因為爸爸都攰攰喇
HEA 到差唔多時間就去碼頭坐船返香港 LU, 我返到屋企都差唔多 2300, 攰死人喇 ...
雖然攰, 但爸爸開心, 就咩都值得啦
 November 14 食完又黎整過November 12, 2008 (Thursday)
今日約左 KL 班舊同事食 LUNCH, 因為 ber ber 結婚喇, 今日返去主要係攞帖
既然係咁, 我尋日整左 d 藍莓 muffin & 朱古力 muffin
得到佢地既一致好評, 但當然有進步既空間啦, 因為我都知做得唔好
November 12 衰左November 12, 2008 (Wednesday)
尋日第一次整左 17 小時吐司, 不過可惜完全失敗, 可能個中種雪得太耐, 又可能我搓得唔好, 發唔起
下次要再努力試過先至得 今日又黎蒸水蛋, 今次落多左水, 落少左瑤柱, 終於無咁老喇, 同埋滑左好多
不過都未夠靚仔, 下次再整得好 D 先, 哈哈 ~~November 09 星期日, 做包日November 9, 2008 (Sunday)
今日丁丁約左朋友去九龍灣打機, 我又想去宜家行吓, 咁我自己去九龍灣搵佢啦 ..
我去到之後, 丁丁都未玩完, 咁我自己去宜家啦, 點知, 行行吓, 俾我撞到 TABO'S 伉儷匿係個角落到 "依泣"
(哈哈, 佢地係度睇緊地毯啫)當時莎莎背住我, 我已經做晒手勢叫大口唔好出聲, 點知, 佢既反應出賣左佢囉
嚇唔到莎莎, 失敗呢 ... 陪佢地俾個鞋櫃錢, 佢地又陪我上番機舖搵丁丁, 之後佢地就去拍拖 LU
到丁丁玩完, 我地先去麥當當食個 LUNCH, 之後先去德福 MARKET PLACE, 再去樂富吉之島, 最後去埋又一城 TASTE, 都無我想買既野
 TASTE 有呀, 但無貨, 太過份喇
 美國賣得仲貴過香港, 無理由係美國買返黎呀 ... 但又唔知幾時返貨喎, 真係頂 !!!!  返到屋企之後, 小睡一陣, 就開工做包喇
今日整左牛奶吐司, 咁又可以整西多士俾丁丁食喇 ... 又做多一款提子麥包俾丁丁做早餐 ... 再做多左個中種聽日整我想整左好耐既 17 小時吐司 ... 好開心呀今日, 整左好多包包呀
不過個麥包唔夠色, 下次要加番多 D 黑麥粉先得 November 08 接二連三November 7, 2008 (Friday)
繼尋晚 SHABU SHABU, 我同丁丁今晚繼續 SHABU SHABU
因為有湯底剩, 牛肉又有剩, 連菜 & 烏冬都有剩, 基於我懶呢個重大既因素, 今晚再黎烚吓烚吓, 唔使煮, 正呀!!
不過, 我都有去買多左 PACK 牛肉 & 獅子狗卷, 始終食唔晒可以留, 唔夠丁丁食就弊弊喇
今晚好叻叻, 有影相呀, ahahhhaha ~~
November 07 秋風起, 邊爐黎November 6, 2008 (Thursday)
繼尋晚去完力奇打邊爐之後, 今晚又約左艾力, suki & YY 上黎屋企 shabu shabu, 因為上個星期我地買左個新爐, 所以咪約佢地上黎一齊剪綵囉
尋日我已經去買左大量既肉肉, 有去 d 專賣凍肉既舖頭 (即係懶貴嗰 d 呢), 亦都有去佳寶買
個人覺得, 肉質分別唔大, 所以下次都係去佳寶買算, 一黎平 d, 二黎又近, 三黎又好味, 呵呵 ~~
個湯底我自己整架, 唔係買現成, 好甜呢, 正呀!!
今晚有肉肉, 有菜菜, 有獅子狗卷, 有蘿蔔, 有金菇, 有鮮冬菇, 有芋絲, 有烏冬, 仲有飯飯添, 好豐富呀!! 計番都係每人 $62, 我覺得好抵呀
飯飯係最尾加落 d 湯度, 當湯飯咁食, 雖然湯多左 d, 蛋蛋唔係太包得住 d 飯粒, 但都已經好好味喇, 好鮮甜呀!!! (又忍唔住要讚吓自己添
)甜品有豆腐花, 當然係買架啦. 我仲有早餐俾佢地帶走架, 就係每人兩個 blueberry muffin
真係每次有朋友上黎食飯, 都捧住個肚走咁滯, ahahahahaa
不過, 今晚最最最失敗既係, 我唔記得影相
P.S. 力奇真係以後都唔使去喇, 又貴左, 又細碟左, 零 service, 同埋我覺得無之前咁好食喇 ...
November 06 MAY MAY 大日子November 2, 2008 (Sunday)
今日係 MAY MAY 既大喜日子, 話咁快就識左 10 年喇, 而且佢特登係澳洲返番擺酒, 點都要去啦
佢係朗豪酒店 42/F 星願亭擺, 嗰度真係好靚, 我之前都諗過架, 不過真係太細喇, 放唔落我地 28 圍, 所以無得揀
HEHE, 我覺得 (莎莎 & JUNE 都覺
), 註冊嗰時既氣氛, 我結婚嗰晚熱鬧 D, 同埋賓客都合作 D 不過, FEEL 到佢老公好錫佢, 希望 MAY MAY 生活愉快, 幸福快樂, 快 D 生番幾個 B B 啦, 哈哈 ~~
亞蘇教既西多士November 1, 2008 (Saturday)
早幾日亞蘇教整西多士, 丁丁睇完之後, 已經話想食
好啦, 佢話想食, 咁等我整左吐司先啦
其實自從我識整麵包之後, 都好少買喇, 除左我偷懶既日子之外
尋晚焗好吐司, 今晚整西多俾丁丁做宵夜啦 ...
整體黎講係好味, 不過對我黎講甜左好多 (話晒我都唔係好食甜野), 但丁丁就啱啱好
個吐司仍然有待改進, 始終未夠鬆軟 (搓既時候已經知)
下次可以再整, 因為丁丁鐘意食, 呵呵
November 02 蒸魚初體驗October 31, 2008 (Friday)
爸爸下晝入左黎同我飲茶, 因為今日全家都會上黎食飯, 所以佢早 D 入黎先
飲完茶之後, 我地就齊齊去買餸啦
我見爸爸係度, 梗係叫佢蒸魚俾我食啦, 因為我好怕洗完魚之後對手腥亨亨, 同埋好怕去魚檔見到血淋淋既場面 ...
點知 ... 返到屋企, 爸爸走去瞓覺, 結果條魚都係要我自己洗 =__=
今晚都係煮 D 家常便飯, 烚菜心, 瑤柱蒸水蛋 (都係蒸到老晒
), 沙嗲金菇肥牛, 焗排骨 & 梅菜蒸脘魚第一次蒸魚, 我覺得都合格, 時間啱啱好, 好滑, 而且個味又適中
不過, 我諗我唔會成日都蒸魚, 始終魚檔真係好恐怖 ...
October 29 雷霆喪星 Tropic ThunderOctober 28, 2008 (Tuesday)
今日終於睇左 <雷霆喪星 Tropic Thunder> 喇 ... YEAH!!!
 不過, 真係以後都唔去港威, D 位超唔掂, 個 screen 又細
其實套戲可以話係一個幾無聊既故仔, 不過因為有 Ben Stiller, 我既至愛, 所以一定要去睇
佢係想諷刺某 d 荷里活巨星, 咁始終我唔係美國人, 無特別既共鳴, 但絕對好睇. 同埋成套戲好多粗口, 好好笑 ...
但我覺得最驚喜既係 Tom Cruise, 頭幾個 shot 我都認唔出佢, 佢真係好正!!
好開心好好睇, 好鐘意 Ben Stiller ... 正正正正正!!!
 October 22 九龍新界一天遊October 18, 2008 (Saturday)
原本上個星期六同家姐去睇蛋糕模, 但因為爸爸入醫院既關係, 今日去返 ...
約左家姐 11am 係油麻地等, 算佢啦, 唔係遲太多 (佢同我亞媽一樣, 係遲到大王黎架 ... )
行左唔係好耐咋, 都睇唔啱, 香港 d 蛋糕模真係好醜樣呀
call 丁丁出黎接我地, 原本直接入馬安山返爸爸去飲茶, 但爸爸話去牛頭角接埋婆婆 ... 哦 ... 咁去囉
飲完茶, 我地又入上水 lu ... 因為佢地又去探多多呀
我同丁丁留到 7 點左右就走喇, 想兩個人去橕吓枱腳嘛
本來諗住返長沙灣食豬排麵, 但諗諗吓, 我話想返沙角村 d 冬菇亭食乳鴿, 好好味架
等位都等左半個鐘, 好肚餓呢 ... 坐低左之後, 我地叫左 1 隻乳鴿, 1 碟炒蜆, 1 碟蝦醬通菜, 3 碗白飯, 3 支可樂, 埋單盛惠 $128, 抵呀!!
係食緊既途中, 有對情侶搭枱, 個女仔俾我同丁丁既感覺係未去過大排檔架囉 ... 同埋, 個樣都食得好唔情願咁 ... 哈, 唔通時下 d 小姐真係咁 "矜貴" ??
 食飽飽返屋企睇 <與敵同行> 大結局, 呢套劇我無追開架, 因為頂唔順亞鄭生 d 叫聲 & 屎到爆既所謂演持, 所以佢都係去專心溝亞姣佘算啦, 收皮吧
不過, 郭晉安真係做得好好, 好奸呀佢 ... 唔通姓郭既, 都係勁 d 既? wakkakakaka ...
Happy Night Out @ WanchaiOctober 17, 2008 (Friday)
今晚又約左 JOLA, KITT, MEI & DA DA 出去飲野兼傾計
我就提議去灣仔食喇沙, 因為上次亞 KITT 帶完我去食之後, 我就好掛住嗰間舖頭喇, 真係好好味架
MEI MEI 要睇完醫生先黎, 我地就去 JOLA 介紹嗰間 BAR 坐低先啦
JOLA 上次同佢 HONEY 搵到間好平既 BAR, 6 - 8PM $20/ bottle beer, 8 - 10pm $26/ bottle beer ... 真係超抵呀
我地未夠 8 點坐低, 到 10 點幾, 我飲左 4 支都唔使 $100, 好開心呀!!!
之後子恆都黎埋, 而佢同亞 mei 都未食野, 咁我地一行 6 行就去喜喜食吓野先啦
今晚又笑到肚痛兼牙較痛喇, 真係好辛苦呀, 不過非常開心, 我真係愛死你地呀!!!
食飽後決定上亞 kitt 度坐, 去 OK 買左 d 酒, 就上去 hea lu
又傾又笑又講到 2 點幾, 我地就散喇, 因為大家都攰攰喇
今晚真係過得好開心呀, 希望我地可以快 d 再出黎笑笑笑啦 !!!!
October 20 大吉居酒屋 @ 中環October 16, 2008 (Thursday)
今日唔使返工, 不過 10 點幾已經俾 agent 打黎嘈醒左 ... 問完一大輪野, 已經瞓唔番, 咁就算啦, 起身上網 & 睇電視啦
lunch 煮完麵食, 洗多機衫, 掃地抹地, 執吓屋啦, 幾日無做過呢 d 野喇 ... 丁丁無恤衫著喇 ...
4 點零鐘出發去威記探爸爸, 兩日無去過, 好不孝呀我
準時 5 點半到, 點知一去到, 爸爸同我講, 話今日可以出院  好在亞 B 都係度, 可以同爸爸返屋企. 我就同爸爸傾住計等家姐黎到, 我 6 點半左右就走 LU, 因為今晚約左同丁丁朋友食飯慶人地生辰
今晚去到中環食呀, 間野叫大吉居酒屋, 食日式放題架, $188 加一, 包任飲汽水 & ASAHI. 尋日上 OPEN RICE 睇, 話 D service & food quality 唔係好得 ...
都唔係丫, 有好多野食揀喎, d 魚生都 ok 新鮮, 上菜速度一 d 都唔慢, d 待應生都好好禮貌呀!! 可以再去, 因為真係幾好味
今晚食得好開心呀, 一路食一路笑, 食到 10 點幾我地都走喇, 因為丁丁地要趕返屋企打機喎
返到去 2345, 整埋麵包, 沖埋涼, 差唔多 3 點上床瞓覺覺 LU ...
做慣豬兒, 懶做工???October 15, 2008 (Wednesday)
返左 3 日工, 今日終於頂唔順, 辭工!!!
其實, 好大原因係丁丁唔想我做呢間公司 ...
同埋, 連我自己都唔知, 原本我入去係 replace 入, 而唔係加多我一個囉, 仲要個女仔得 3 日時間做所謂既 hand-over
星期一, 我已經係混亂中渡過, 唔講 flow, 唔 brief 一次個客點跟, 就直接開波做啦!! 點做呀, 先知呀我!! 而且因為今日一定要去探爸爸, 我先唔理 D 野, 7 點鐘走人 ...
星期二, 淨係係 N 個 box file 入面搵番要既資料, 都已經用左我一個朝早 ... 真係頂!! 我叫個女仔大致上講一次個客點跟, 個 flow 係點, 佢唔講囉, 話到時做到就會知架喇喎 ... 真 funny!! 出 mail 又要俾佢睇過先, 嘥晒我 d 時間!! 佢地分工係分得好仔細, 但其他同事做完, 我又要翻手 check 多次, 咁不如我自己一個做都無咁嬲, 起碼我唔使等囉 ... 就係咁搞黎搞去, 做完 6 成今日一定要清既野, 我都唔理喇, 8 點走人 ... 返到長沙灣先買外賣, 返屋企洗落衫, 執企理間屋 (因為一陣艾力 & 亞龍上黎同丁丁傾野), "畢" 埋班仔 d 臭臭, 成 9 點半先食我個大辣米線
 星期三, 之前嗰晚同丁丁傾左一陣, 佢唔贊成我再做呢份工, 因為佢唔想我太辛苦 ... 事緣尋日同另外個同事食 lunch 既時候, 佢話我知, 平時要做到成 11, 2 點, 星期六都要 5, 6 點先有得放工 ... 咁丁丁話一個星期做成 60 幾個鐘為咩啫, 屋企又唔係等我開飯, 要我今日辭工. 其實我都掙扎左好耐, 因為始終唔係幾好意思, 覺得好似好衰咁 ... 不過, 今日既 work flow 同尋日一樣咁嘥時間, 我自己都頂唔順 ... 但我都要成 7 點先有時間同亞姐講唔做, 執埋 d 手尾, 今日 9 點先離開公司
係我走之前, 同我隔離位個女仔傾左幾句, 佢同我講話我唔係第一個做幾日就走, 之前請過 3, 4 個都係咁, 叫我唔需要有 hard feeling ...anyway 點都好啦, 有得揀我真係唔想做番 garment 呢行囉 ... 唉 ... 我要努力加油呀!!!
October 15 威記 "是 Dark Dor"October 11, 2008 (Saturday)
今日下晝丁丁陪我坐小巴去官塘視察行車路線 & 時間, 家姐又想約我去睇焗模喎, 咁就約佢係 APM 等啦 ...
點知 on the way 去 APM 既途中, 亞媽打黎話亞爸好唔舒服, 叫我 & 丁丁返馬鞍山睇吓佢
MEET 埋家姐之後, 我地就一齊坐巴士返入去啦 ...
成個下晝爸爸都好精靈喎, 無咩野, 又無嘔, 又無暈 ... 媽媽放工返到黎之後, 仲諗住一齊出去食飯添
點知到出門口既時候, 爸爸就嘔得好犀利, 又好暈喎 (其實出門口之前 10 分鐘左右, 爸爸都有勁嘔) ...
見到佢咁, 我地就梗係唔食啦, 仲 CALL 白車送佢入急症添
其實重陽嗰日佢已經唔妥當架啦, 早早叫佢入威記, 佢就死都唔肯入
上次都試過因為病得好勁, 但又死都唔肯入醫院, 差 D 救唔番架啦, 佢都唔知驚既 ... 唉 ... 真係俾佢激死
今晚既急症室唔係太多人咋喎, 等左兩個鐘, 就有得見醫生喇 ...
不過, 當時我地已經走左 LU, 因為爸爸叫我地快 D 去食飯 (當時已經 9 點幾)
爸爸每次入親威記, 都起碼要住 5 日, 即係黎緊既 1 個星期, 我又會晚晚係威記出入喇
P.S.
各方好友, 唔使擔心翹爸既健康, 因為佢唔會好得番架喇, 只係唔希望惡化落去啫 ...
至於翹翹 ... 可能呢幾年慣左啦, 又可能 3 年前嗰次太勁 (對我黎講), 早就已經有心理準備爸爸遲早會走, 所以係呢個 moment 都無咩 hard feeling ... 不過, 到真係事實既時候, 我諗我會喊到痴左囉 ... anyway, 多謝左你地先啦
October 12 發牢騷October 11, 2008 (Saturday)
其實我會寫野係呢個 SPACE, 都係想記低一 D 我對某 D 事既感覺, 感受 & 睇法 ...
講句衰 D, 只要我無指名道姓咁講咩人, 理得我寫 D 咩啫
點解成日都要係我寫完某 D 野之後, 就話我唔好, 亂諗野, kind of 身在福中不知福既語氣 ...
而家係咪唔俾人有想法呀, 我知我好幸福, 但係咪就唔可以諗野???? 我有無傷害到任何人??
我咁大個人, 絕對知道自己做緊咩喎 ...
想寫出黎發洩吓啫, 都唔得??? 頂 ... 點呀 ... 想點呀!!!!
this is my place, 我想寫咩就寫咩, 我有咩想法都唔關任何人既事!!!!
發完牢騷喇我 ... 瞓覺!!!
瞓醒之後就咩都唔記得, good!!!
|
|
|
